हेटौंडाः हेटौंडामा जारी स्वर्गीय निरज श्रेष्ठ स्मृति दोस्रो विद्यालयस्तरीय क्रिकेट प्रतियोगितामा हेटौंडा–४ स्थित आधुनिक राष्ट्रिय माध्यमिक विद्यालय सेमिफाइनमा प्रवेश गरेको छ । शुक्रबार हुने भनिएको समूह चरणको अन्तिम खेलमा हेटौंडा–१० स्थित सोलिड्यारिटी इन्टरनेशनल एकेडेमी अनुपस्थित भएका कारण आधुनिक राष्ट्रिय माविले समूह चरणको २ खेलमा जित निकाल्दै ४ अंकसहित प्रतियोगिताको सेमिफाइनलमा प्रवेश गरेको हो ।
गतवर्षको उपविजेता समेत रहेको सोलिड्यारिटीका खेलाडीहरु बाहिर गएका कारण सेमिफाइनल खेलमा उपस्थित हुन नसकेको प्रतियोगिताका संयोजक सञ्जोक पोखरेलले जानकारी दिनुभएको छ । अब आधुनिकले फाइनल प्रवेशका लागि आइतबार हेटौंडा–११ स्थित हेटौंडा एकेडेमीसँग प्रतिस्पर्धा गर्नुपर्नेछ ।
प्रतियोगिताको उपाधि विजेता टिमले ४० हजार रुपैयाँ र उपविजेता टिमले २० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै, विधागत उत्कृष्ट खेलाडीहरुका लागि पनि पुरस्कारको व्यवस्था गरिएको छ । प्रतियोगिताको फाइनल खेल सोमबार हुनेछ ।
