हेटौँडाः हेटौँडा उपमहानगरपालिकास्तरीय राष्ट्रपति रनिङशिल्ड खेलकुद प्रतियोगितामा हेटौँडा–१६, हटियास्थित जनप्रिय मावि प्रथम भएको छ । ९ स्वर्ण, ६ रजत र ६ कास्य पदकसहित जनप्रिय मावि प्रथम हुन सफल भएको हो ।
प्रतियोगितामा हेटौँडा–९ स्थित प्रगति मावि द्वितीय भएको छ । प्रगति माविले ९ स्वर्ण, २ रजत र २ कास्य पदक जितेको छ । समान ४ स्वर्ण, २ रजत र २ कास्यसहित हेटौँडा–१८ स्थित ज्योति मावि र हेटौँडा–४ स्थित आधुनिक राष्ट्रिय मावि तेस्रो स्थानमा रहेको छ । पालिकास्तरीय राष्ट्रपति रनिङशिल्ड खेलकुद प्रतियोगिता आधुनिक राष्ट्रिय मावि आयोजक विद्यालयको रुपमा रहेको थियो ।
पालिकास्तरीय प्रतियोगिताबाट छनोट भएका खेलाडीले जिल्लास्तरीय प्रतियोगितामा सहभागिता जनाउनेछन् । शुक्रबार सुरु भएको प्रतियोगिता आइतबार सकिएको हो ।
