हेटौँडाः मकवानपुरका अनलाइन मिडियाकर्मी संगठित भएका छन् । बिहीबार एक भेलाले धर्मेन्द्र दाहालको अध्यक्षतामा अनलाइन मिडिया एशोसिएसन नेपाल (ओमान) गठन गरिएको छ ।
ओमानको वरिष्ठ उपाध्यक्षमा रवीन्द्र गौतम, उपाध्यक्षमा सुनिता विष्ट र रुपक कालिराज, महासचिवमा उज्वल अधिकारी, सचिवमा मनोज देवकोटा र राजेश थापा, कोषाध्यक्षमा प्रवेश धिताल चयन हुनुभएको छ । ओमानको सदस्यमा दीपेश दाहाल, गोविन्द तिमल्सिना, भूपेन्द्र राना चयन हुनुभएको छ । अनलाइन मिडियालाई व्यवस्थित गरी जिम्मेवार मिडिया बनाउन संगठिन भएको अध्यक्ष दाहालको भनाइ छ । ओमानमार्फत स्वरोजगार अनलाइन मिडियालाई स्तरीय र विश्वसनीय बनाई टिकाउने वातावरण बनाउन पहल गरिने उहाँले बताउनुभयो ।
भेलामा सहभागीले अनलाइन मिडियालाई संस्थागत गरी सञ्चालन गर्न आवश्यक रहेको औँल्याएका थिए । अनलाइन मिडिया सञ्चालन गर्न र सूचना लिन पनि सहज भए पनि विश्वसनीय सूचनाको अभावमा विश्वसनीयता कमजोर रहेको सहभागीले बताएका थिए । भेलामा मकवानपुरमा सञ्चालिन ३० वटा भन्दा बढी अनलाइन माध्यमका सञ्चालकको सहभागिता रहेको थियो ।
