हेटौंडाः दोस्रो संस्करणको हेटौंडा मेयर कप फुटबल प्रतियोगिता आगामी जेठ १५ गतेदेखि सुरु हुने भएको छ । नगर खेलकुद विकास समितिको व्यवस्थापनमा हुने प्रतियोगिता हेटौंडा–५, पिप्लेस्थित पिप्ले–क्याम्पा रंगशालामा सञ्चालन हुने जनाइएको छ ।
प्रतियोगितामा सहभागी हुन उपमहानगरभित्रका सबै वडालाई पत्र पठाइसकेको हेटौंडा उपमहानगरपालिका युवा तथा खेलकुद शाखाका प्रमुख बसन्त सिटौलाले बताउनुभयो । प्रतियोगितामा सहभागी जनाउन जेठ १३ गतेसम्म टिम दर्ता गर्न भनिएको छ । नकआउट चरणमा हुने प्रतियोगिताको फाइनल खेल जेठ २० गते हुनेछ ।
प्रतियोगिताको विजेताले नगद २ लाख रुपैयाँसहित शिल्ड, मेडल र प्रमाणपत्र प्राप्त गर्नेछन् भने उपविजेता टिमले १ लाख ५० रुपैयाँ प्राप्त गर्नेछन् । यस्तै, सेमिफाइनलमा प्रवेश गर्ने दुई टिमलाई ५०–५० हजार रुपैयाँ र विधागत उत्कृष्ट खेलाडीलाई ५–५ हजार रुपैयाँ प्रदान गरिने जनाइएको छ ।
