हेटौंडाः हेटौंडामा जारी उपमेयर कप महिला तथा पुरुष भलिबल प्रतियोगिता अन्तर्गत महिलातर्फको फाइनल र पुरुषतर्फको सेमिफाइनल समीकरण पूरा भएको छ । शनिबार महिलातर्फको सेमिफाइनल खेल र पुरुषतर्फ क्वाटरफाइनलका खेल सम्पन्न भएसँगै महिलातर्फ फाइनल र पुरुषतर्फको सेमिफाइनल समीकरण पूरा भएको हो ।
महिलातर्फको फाइनलमा ५ नम्बर वडा र १७ नम्बर वडा भिड्ने भएको छ । शनिबार भएको सेमिफाइनलको खेलमा ५ नम्बर वडा ९ नम्बर वडासँग पराजित भए पनि ९ नम्बर वडाले २ जना खेलाडी वडा बाहिरको खेलाएको पाइएको भन्दै आयोजकले ५ नम्बर वडालाई विजयी घोषित गर्दै फाइनल खेल्ने अवसर दिएको हो । यस्तै साविक विजेता १९ नम्बर वडालाई ३–२ सेटले हराउँदै १७ नम्बर वडा फाइनल प्रवेश गरेको हो । ९ नम्बर वडा र १७ वडा बीच आइतबार दिउँसो १ बजे फाइनल खेल हुनेछ ।
यस्तै, पुरुषतर्फ १३ नम्बर वडा सहभागी नहुँदा १२ नम्बर वडाले सेमिफाइनलमा स्थान बनाएको छ । यस्तै क्वार्टरफाइनल खेलमा १७ नम्बर वडाले ६ नम्बर वडालाई, ११ नम्बर वडाले १६ वडालाई र १९ नम्बर वडाले ५ नम्बर वडालाई पराजित गर्दैं सेमिफाइनल यात्रा तय गरेको हो । तीनवटै क्वार्टरफाइनल खेल २–० को सोझो सेटमा सकिएको थियो । आइतबार बिहान हुने सेमिफाइनलका खेलमा १२ नम्बर वडा र १७ नम्बर वडा तथा १९ नम्बर वडा र ११ नम्बर वडा भिड्नेछ । पुरुषतर्फको फाइनल आइतबार दिउँसो ३ बजे हुनेछ ।
प्रतियोगिताको विजेताले नगद ५० हजार रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेता टिमले नगद २५ हजार रुपैयाँसहित शिल्ड, मेडल र प्रमाणपत्र प्राप्त गर्नेछ ।
