हेटौंडाः २५ बर्षीय युवकको घाँटी रेटी हत्या गरेको अरोपमा बारा प्रहरीले दुईजनालाई पक्राउ गरेको छ । गत मंगलबार राती अन्दाजी ११ बजेको समयमा बारा जिल्लाको जितपुर–सिमरा उपमहानगरपालिका–२० बसडिलवाका २५ बर्षीय दीपक पासवानको घाँटी रेटी हत्या गरेको अभियोगमा जितपुर–सिमरा–२० बसडिलवाटोलकै २० बर्षीय शेख नवि आलम र २१ बर्षीय शेख सलिमलाई बारा प्रहरीले पक्राउ गरेको जनाएको छ ।
स्थानीय कठोह खोला छेउमा बालुवामा पुरिएको अवस्थामा दीपक पासवानको शव गत शुक्रबार फेला परेको थियो । घटनाको सम्बन्धमा अनुसन्धान गर्दा धारिलो घरेलु हतियार बखुवा (खुर्पा) ले निर्ममतापूर्वक घाँटी रेटी हत्या गरेको पाइएको प्रहरीले जनाएको छ । घटनापछि फरार रहेका शेख सलिम र शेख नवि आलमलाई प्रहरीले आइतबार पक्राउ गरी ज्यानसम्बन्धी कसूर (कर्तव्य ज्यान) मुद्दा दर्ता गरिएको छ । प्रहरीले बारा जिल्ला अदालतबाट पहिलो पटक ७ दिन को म्याद अनुमती लिई हिरासतमा राखी थप अनुसन्धान गरिरहेको छ ।
