हेटौंडाः मकवानपुर प्रहरीले ९ किलो ८ सय ग्राम लागुऔषध गाँजासहित पाँच जनालाई पक्राउ गरेको छ । आइतबार राति ९ बजेको समयमा प्रहरी चौकी भैंसेबाट खटिएको प्रहरी टोलीले भीमफेदी–२ भैसे चेकपोष्टमा सवारी साधनहरु रोकी सुरक्षाजाँच गर्ने क्रममा भीमफेदीबाट हेटौंडा तर्फ आउँदै गरेको बा ०३–००१ च ११४४ नम्बरको टाटा योद्धा गाडीमा लुकाई छिपाई ल्याएको लागुऔषध गाँजासहित पाँच जनालाई पक्राउ गरेको हो ।
पक्राउ पर्नेमा भीमफेदी–५ का ३२ वर्षीय सविन रिजाल, २५ वर्षीय सोम सिं घलान, ६० वर्षीया जुठीमाया घलान, ६७ वर्षीय मान बहादुर घलान र ५० वर्षीय संचार सिं घलान रहेको जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिनुभयो । लागुऔषध गाँजा, गाडीसहित उनीहरुलाई पक्राउ गरी जिल्ला अदालत मकवानपुरबाट १५ दिनको म्याद अनुमती लिई थप अनुसन्धान भइरहेको प्रवक्ता रिमालले जानकारी दिनुभयो ।
