हेटौंडाः हेटौंडा उपमहानगरपालिका १० नम्बर वडा कार्यालयले वडामा रहेका दुई विद्यालयका विद्यार्थीलाई पोशाक र शैक्षिक सामग्री वितरण गरेको छ । ज्ञानदा माध्यमिक विद्यालय र संस्कृत वेद विद्यालयका विद्यार्थीलाई मंगलबार सहयोग गरेको हो ।
करिव २ लाख २६ हजार रुपैयाँको स्वेटर, पोशाक, जुत्ता र एक लाख रुपैयाँको शैक्षिक सामग्री विद्यालयलाई हस्तान्तरण गरिएको छ । वडाध्यक्ष कितापसिं लामाको सभाध्यक्षता तथा विद्यालयका पूर्व अध्यक्ष फुर्वा दोर्जे लामाको प्रमुख आतिथ्यमा कार्यक्रम भएको हो ।
यसैगरी शैक्षिक सत्र २०७७ अन्तर्गत ज्ञानदा माविले नेपाल सरकारबाट प्राप्त गरेको ४४ हजार रुपैयाँको छात्रवृत्ति वितरण गरेको छ । ईसिडिदेखि कक्षा १० सम्मका कक्षागत प्रथम, द्वितीय र तृतीय हुने विद्यार्थीलाई पुरस्कार समेत वितरण गरिएको छ । कार्यक्रममा विद्यालय व्यवस्थापन समितिका अध्यक्ष ईन्द्रप्रसाद नेपाल, वडा सदस्य धर्म बस्नेत, साधना श्रेष्ठ, उमा सुनुवार र प्रधानाध्यापक रमेश सुवेदी लगायत शिक्षक तथा विद्यार्थीको उपस्थिति रहेको थियो ।
