हेटौंडाः जिल्ला प्रशासन कार्यालय मकवानपुरले कोरोना भाइरस संक्रमणको जाखिमका कारण शैक्षिक संस्था बन्द गर्न सूचना जारी गरेसँगै हेटौंडा उपमहानगरपालिका क्षेत्रका विद्यालय तथा क्याम्पसहरु बन्द भएका छन् । जिल्ला प्रशासन कार्यालयले मंगलबार सूचना जारी गर्दै शिक्षण संस्थाहरुले विद्यार्थीको भौतिक उपस्थितिमा कक्षा सञ्चालनमा रोक लगाएपछि शैक्षिक संस्थाहरुको पठनपाठन कार्य बन्द भएको हो ।
प्रशासनले पठनपाठन बन्द भए पनि पूर्वनिर्धारित परीक्षा सञ्चालन गर्न सकिने जनाएपछि कतिपय सार्वजनिक विद्यालयहरुले वार्षिक परीक्षा सुरु गरेका छन् । अन्य सामुदायिक तथा संस्थागत विद्यालयहरुले पनि परीक्षाको तयारी अघि बढाएका छन् । हेटौंडा उपमहानगरपालिकाको शिक्षा विकास महाशाखाले पनि बैशाख ९ गतेबाट कक्षा ८ बाहेकका अन्य कक्षाको वार्षिक परीक्षा सञ्चालन गर्न निर्देशन दिएपछि विद्यालयहरु परीक्षामा जुटेका हुन् ।
हेटौंडा–४ स्थित आधुनिक राष्ट्रिय माध्यमिक विद्यालयले आइतबारबाट कक्षा ८ र १० बाहेकको वार्षिक परीक्षा सञ्चालन गर्ने भएको छ । कक्षा ८ र १० का विद्यार्थीहरुलाई परीक्षा तयारीका हिसाबले अनलाइन कक्षा सुरु गरिएको विद्यालयका सहायक प्रधानाध्यापक रामसागर गुरागाईंले जानकारी दिनुभयो । कक्षा १० को एसईई पूर्वतयारी परीक्षा चैत २२ गतेबाट नै लिइएको र कक्षा ८ को परीक्षा हेटौंडा उपमहानगरपालिकाले बैशाख १९ गतेदेखि लिने तयारी गरेको गुरागाईंले बताउनुभयो ।
हेटौंडा ४ कै भूटनदेवी माध्यमिक विद्यालयले पनि कक्षा ८ र १० बाहेक अन्य कक्षाको परीक्षा आज शुक्रबारबाट सञ्चालन गर्ने भएको छ । भूटनदेवीले गत आइतबारदेखि कक्षा १० को एसईई पूर्वतयारी परीक्षा सञ्चालन गरिरहेको विद्यालयका प्रधानाध्यापक माधव दाहालले जानकारी दिनुभयो । विद्यालयको कक्षा ११ र १२ को आन्तरिक परीक्षा बैशाख १७ गतेदेखि २४ गतेसम्म सञ्चालन गरिने र आइतबारबाट अनलाइन पठनपाठन गरिने दाहालले जानकारी दिनुभएको छ ।
हेटौंडा–२, संगमचोकस्थित ज्ञानोदय बालबाटिकामा कक्षा ८ र एसईईबाहेकका परीक्षा चैत २२ गतेदेखि सुरु भई सम्पन्न भएको विद्यालयका लेखा प्रशासन प्रमुख कपिल भण्डारीले जानकारी दिनुभयो ।
यसैगरी, हेटौंडा–२ स्थित सिद्धार्थ माध्यमिक विद्यालयमा एसईई पूर्वतयारी परीक्षा चलिरहेको प्रधानध्यापक मोहनप्रसाद शर्माले जानकारी दिनुभएको छ । सिद्धार्थले आइतबारबाट कक्षा १ देखि ६ सम्मको परीक्षा सावधानीपूर्वक र सुरक्षा मापदण्ड अपनाएर दुई सिफ्टमा सञ्चालन गर्ने भएको छ । कक्षा ७ र कक्षा ९ को परीक्षा भने बैशाख १४ गतेदेखि हुने प्रधानाध्यापक शर्माले बताउनुभयो । कक्षा ११ र कक्षा १२ को परीक्षाको तयारीमा रहन विद्यार्थीहरुलाई आग्रह गरिएको उहाँले बताउनुभयो ।
हेटौंडा–१ स्थित अमर माध्यमिक विद्यालयमा पनि कक्षा ८ र एसईईबाहेकका परीक्षा बिहीबारदेखि सुरु भएको विद्यालयका प्रधानाध्यापक मालती उप्रेतीले जानकारी दिनुभयो । स्वास्थ्य मापदण्ड अपनाएर दुई सिफ्टमा परीक्षा सञ्चालन भइरहेको उप्रेतीले बताउनुभयो ।
