हेटौंडाः युवाहरुको प्रतिभालाई उजागर गर्ने उद्देश्यले बागमती प्रदेश सरकारले प्रतिभाको खोजी तथा प्रोत्साहन कार्यक्रम अघि सारेको छ । बागमती प्रदेशका सामाजिक विकास मन्त्रालयले शुक्रबार हेटौंडामा युवा प्रतिभाको खोजी तथा प्रोत्साहनमा टेवा पुर्याउने उद्देश्यले लेखन प्रतियोगिता गरेको हो ।
राष्ट्रिय युवा परिषद्को सहकार्यमा मन्त्रालयले समृद्ध राष्ट्र निर्माणका लागि युवाका विचारहरु विषयक प्रदेशस्तरीय लेखन प्रतियोगिता आयोजना गरेको हो । बागमती प्रदेशका ८ वटा जिल्लाका विभिन्न स्थानीय तहका युवा तथा विद्यार्थीहरु कार्यक्रममा सहभागी भएका थिए ।
प्रतियोगितामा कविता राना मल्ल प्रथम, बनेपा नगरपालिकाकी आरती ढुंगाना द्वितीय र चा“गुनारायण नगरपालिकाकी अर्चना तिमल्सिना तृतीय भएका थिए । यस्तै, रसुवाकी सपना गोले तथा मेलम्ची (सिन्धुपाल्चोक)की सरिता भट्टराई सान्त्वना भएका थिए । प्रतियोगितामा प्रथम, द्वितीय, तृतीय र सान्त्वना हुनेले क्रमशः १५ हजार, १० हजार, ६ हजार र ३ हजार नगद पुरस्कार प्राप्त गरेका थिए ।
कार्यक्रममा सामाजिक विकास मन्त्रालयका उपसचिव रुद्रहरि भण्डारी, राष्ट्रिय युवा परिषद्का उपसचिव देवीप्रसाद अधिकारी, मकवानपुर बहुमुखी क्याम्पसका क्याम्पस प्रमुख डा. शंकरप्रसाद उपाध्याय, जिल्ला युवा समिति मकवानपुर अध्यक्ष शिवहरि दाहाललगायतको आतिथ्यता थियो ।
