हेटौंडाः हेटौंडास्थित आइसोलेसन वार्डबाट कोरोना भाइरस परीक्षणका लागि आज आईतबार ४६ वटा नमूना हेटौंडा १० स्थित प्रयोगशालामा पठाइएको छ । आइसोलेसन वार्डका भोला चौलागाईका अनुसार आज पठाइएका नमूनाको रिपोर्ट भोलिसम्म प्राप्त हुनेछ ।
हिजो शनिबार पठाइएका नमूनामध्ये २० र अस्ति पठाइएको १७ वटा नमूनाको रिपोर्ट आउन बाँकी छ । आज बेलुकासम्ममा ती नमूनाको रिपोर्ट आउने चौलागाईले बताउनुभएको छ । अब अस्ति, हिजो र आजको गरी ८३ जनाको रिपोर्ट आउन बाँकी रहेको छ । हेटौंडा–४, कर्रास्थित आइसोलेसन कक्षमा आज २० जना रहेका छन् । जसमा १६ जना कोरोना संक्रमण पुष्टि भएका व्यक्ति र ४ जना कोरोना भाइरस संक्रमणको आशंका गरिएका व्यक्तिहरु उपचाररत रहेका छन् ।
