हेटौंडाः हेटौंडा–४, कर्रास्थित आइसोलेसन वार्डबाट शुक्रबार ८७ जनाको स्वाब संकलन गरेर कोरोना परीक्षण गर्दा ३२ जनाको रिपोर्ट नेगेटिभ आएको छ । शुक्रबार स्वाब सङ्कलन भएको ८७ जना मध्ये ५५ जनाको रिपोर्ट आउन बाँकी रहेको हेटौंडास्थित आइसोलेसन वार्डका प्रमुख डा. अर्जुन खड्काले बताउनुभयो ।
डा. खड्काका अनुसार आज पनि ४२ जनाको स्वाबको नमूना कोरोना परीक्षण गर्न हेटौंडा–१०, स्थित कोरोना प्रयोगशालामा पठाइएको छ । हाल हेटौंडास्थित आइसोलेसन वार्डमा १६ जना कोरोना संक्रमितहरु उपचाररत छन् । त्यस्तै ३ जना कोरोना लक्षण भएका व्यक्ति पनि उपचाररत रहेको उहाँले बताउनुभयो । हालसम्म हेटौंडास्थित आइसोलेसन वार्डबाट ४५ जना कोरोना संक्रमितले उपचार सेवा लिएका छन् भने २९ जना कोरोना संक्रमण पुष्टि भएकाहरु निको भएर घर फर्किएका छन् ।
