हेटौंडाः मदन भण्डारी स्वास्थ्य विज्ञान प्रतिष्ठानको उपकुलपतिमा नियुक्त हुनुभएका प्राध्यापक डाक्टर विश्वराज जोशीले आज सपथ ग्रहण गर्नुभएको छ । बागमती प्रदेशका मुख्यमन्त्री एवम् प्रतिष्ठानका कुलपति डोरमणि पौडेलले उपकुलपति प्राध्यापक डाक्टर विश्वराज जोशीलाई सपथग्रहण गराउनुभएको हो । देशका सात प्रदेश सरकार मध्ये बागमती प्रदेशले पहिलो पटक स्वास्थ्य विज्ञान प्रतिष्ठान स्थापना गरी उपकुलपति नियुक्त गरेको हो ।
प्रदेश सरकारले साउन १४ गते प्राध्यापक डाक्टर विश्वराज जोशीलाई ४ वर्षका लागि उपकुलपतिमा नियुक्त गर्ने निर्णय गरेको हो । उपकुलपति नियुक्तिसँगै प्रतिष्ठानको कामले तीव्रता पाउने बताइएको छ । उपकुलपतिको सपथग्रहणका लागि प्रतिष्ठानको विषयमा अन्तरक्रिया समेत गरिएको थियो । देशका विभिन्न स्वास्थ्य विज्ञान प्रतिष्ठानका उपकुलपति, निर्देशकहरुले मदन भण्डारी स्वास्थ्य विज्ञान प्रतिष्ठानसँग सहकार्य गरेर अगाडि बढ्ने प्रतिवद्धता व्यक्त गरेका छन् । सामाजिक विकास मन्त्री एवम् प्रतिष्ठानका उपकुलपति युवराज दूलालको अध्यक्षता तथा प्रतिष्ठानका कुलपति एवम् मुख्यमन्त्री डोरमणि पौडेलको प्रमुख आतिथ्यमा भएको सपथग्रहण कार्यक्रममा सामाजिक विकास मन्त्रालयका सचिव दीपक काफ्लेले प्रतिष्ठानको गठनदेखिको प्रक्रियाका बारेमा जानकारी गराउनुहुँदै प्रतिष्ठानको उद्देश्यका बारेमा जानकारी दिनुभएको थियो ।
