हेटौँडा : बामपन्थी लेखक, साहित्यकारहरुको संस्था प्रगतिशील लेखक संघ (प्रलेस) को बागमती प्रदेश अध्यक्षमा मकवानपुरकी शान्ति प्रियवन्दना सर्वसम्मत निर्वाचित हुनुभएको छ । सोमबार काठमाडौंमा भएको तेस्रो अधिवेशनबाट शान्ति सर्वसम्मत निर्वाचित हुनुभएको हो । शान्तिको अध्यक्षतामा २५ सदस्यीय प्रदेश समिति सर्वसम्मत चयन भएको छ ।
समितिको सचिवमा मकवानपुरकै डीबी बर्तौला र कोषाध्यक्षमा चिरञ्जीवी लामिछाने चयन हुनुभएको छ । प्रलेस मकवानपुरकी पूर्वअध्यक्ष शान्ति प्रदेशको पहिलो महिला अध्यक्ष समेत हुनुहुन्छ । यसअघि मकवानपुरमा पनि पहिलो महिला अध्यक्षको रुपमा शान्तिले जिम्मेवारी सम्हाल्नु भएको हो । २०३८ सालमा मकवानपुरका प्रलेस स्थापना भए पनि पहिलो महिला अध्यक्षको रुपमा शान्तिले २०७५ सालमा जिम्मेवारी सम्हाल्नुभएको थियो ।
कविता र निबन्ध लेखनमा बढी रुचि राख्नुहुने शान्तिको २०७८ सालमा कविता संग्रह ‘जिल खाइरहेको २१औं शताब्दी’ प्रकाशित छ । शान्तिले पहिलो कृतिबाटै ५० हजार राशिको ‘साहित्य पोष्ट उत्तम काव्य पुरस्कार–२०७८’ प्राप्त गर्नुभएको छ । दोस्रो कृतिको रुपमा २०८२ सालभित्र निबन्ध संग्रह प्रकाशनको तयारी गरिरहेको शान्ति सुनाउनुहुन्छ । प्रलेसको जिल्ला हुँदै प्रदेश अध्यक्ष हुनु भएकी शान्ति प्रलेसमार्फत बामपन्थी विचार प्रवद्र्धनका लागि बहस सञ्चालन गर्ने बताउनुहुन्छ ।
