हेटौंडाः मकवानपुर जिल्ला तेक्वान्दो कार्य समितिले निर्माण गरिरहेको कभर्ड हललाई ५० हजार रुपैयाँ सहयोग प्राप्त भएको छ । हेटौंडा–४, कर्रामा निर्माणाधीन कभर्ड हलका लागि लाइफ इन्स्योरेन्स कम्पनिका एरिया म्यानेजरद्वय भरत दाहालले २५ हजार र नन्दलाल दासले २५ हजार रुपैयाँ आज हस्तान्तारण गर्नुभएको छ । जिल्ला खेलकुद विकास समितिको कार्यालय परिसरमा दाहाल र दासले एकसाथ कुल ५० हजार रुपैयाँ सहयोग गर्नुभएको हो ।
मकवानपुर जिल्ला खेल्कुद विकास समितिका अध्यक्ष सानु लामा र मकवानपुर जिल्ला तेक्वान्दो कार्य समितिका अध्यक्ष लालकाजी रत्न बज्राचार्यलाई सहयोग रकम हस्तान्तरण गरिएको हो । निर्माणाधीन कभर्ड हलको सम्पन्न गर्न विभिन्न क्षेत्रबाट सहयोग संकलनको कार्य भइरहेको र सबैबाट साथ र सहयोगको आश्वासन प्राप्त भएको अध्यक्ष बज्राचार्यले बताउनुभएको छ । छिट्टै निर्माण सम्पन्न गरी नियमित अभ्यास र प्रतियोगिता आयोजना गरिने पनि अध्यक्ष बज्राचार्यले जानकारी दिनुभएको छ ।
