हेटौँडा ः अन्तर्राष्ट्रिय स्वयम्सेवी संस्था लायन्स क्लब इन्टरनेशनलको आयोजनामा हेटौँडामा भोलि शनिबार महिला सम्मेलन हुँदैछ । लायन्स तथा लायन्स भन्दा बाहिर रहेर स्थापित महिला नेतृत्वको विषयमा बहस, विमर्श गर्ने गरी लायन्स क्लब इन्टरनेशनल डिष्ट्रिक्ट ३२५ एस नेपालको आयोजनामा महिला सम्मेलन हुन लागेको हो ।
‘हामी सेवा गर्छौं’ भन्ने नारासहित संसारभर स्थापित लायन्स क्लब इन्टरनेशनल डिष्ट्रिक्ट ३२५ ‘एस’ की अध्यक्ष टासी डोल्मा तुम्बाहाङ्फेले नेतृत्वमा रहेका महिलाहरुसँग, सफल महिलाहरुसँग बहस, विमर्श गर्दै नयाँ पुस्ताका महिलाहरुलाई उत्साहित गर्न सम्मेलनको आयोजना गरिएको जानकारी दिनुभयो । हेटौँडामा हुने कार्यक्रममा नेपाल पत्रकार महासंघकी नवनिर्वाचित अध्यक्ष निर्मला शर्मा, दक्षिण एसियाकै पहिलो महिला फिफा रेफ्री कल्पना शर्मा, जिल्ला बचत तथा ऋण सहकारी संघ लिमिटेड मकवानपुरकी अध्यक्ष कल्पना श्रेष्ठ, लायन्स क्लब इन्टरनेशनल डिष्ट्रिक्ट ३२५ एस की प्रमुख सल्लाहकार ज्योति केसी र स्त्री तथा प्रसुती स्वास्थ्य विशेषज्ञ डा. सौजन्य कर्माचार्यले ‘बाधाहरु तोड्दै नेतृत्वमा महिला र यसको सामाजिक प्रभाव’ शीर्षकको बसहमा सहभागिता जनाउनुहुनेछ ।
सम्मेलनमा अभिप्रेरणात्मक वक्ता मानसी अग्रवाल प्रमुख वक्ताको रुपमा रहनुहुनेछ । सम्मेलनलाई नेतृत्वको विषयमा अंकिता सुमार्गी, सेवाको विषयमा मनु लामा, बजारीकरणको विषयमा विजया ओझा र सदस्यताका विषयमा रोजिता रञ्जितकारले बोल्नुहुनेछ । लायन्स क्लब इन्टरनेशनलको १०७ वर्षको इतिहासमा हालसम्म २ जना मात्रै महिला अध्यक्ष भएको स्मरण गर्नुहुँदै सम्मेलनको आयोजक लायन्स क्लब इन्टरनेशनल डिष्ट्रिक्ट ३२५ एसकी अध्यक्ष टासी डोल्मा तुम्बाहाङ्फेले भन्नुभयो, ‘महिलाहरुले अनेकौं बाधा पार गर्दै सामाजिक सेवाको क्षेत्रमा गरेको योगदानको सम्मान गर्ने र अझै सहभागिता बढाउन प्रेरित गर्ने उद्देश्यले सम्मेलनको आयोजना गरेका हौं ।’
लायन्स क्लबको प्रभाव रहेको देशका प्रमुख सहरबाट एक सय ५० भन्दा बढी महिलाको सहभागिता रहने र हेटौँडा उपमहानगरपालिकाकी प्रमुख मीना कुमारी लामाको प्रमुख आतिथ्यमा सम्मेलनको उद्घाटन समारोह हुने उहाँले जानकारी दिनुभयो । सम्मेलनकै अवसरमा लायन्स क्लबको माध्यमबाट सेवामा समर्पित रहँदै विभिन्न बाधाहरु तोड्दै लायनवादको वृद्धि र विकासमा योगदान पुर्याउने ४ जना महिलालाई सम्मान समेत गरिने बताइएको छ । लायन्स क्लब इन्टरनेशनल डिष्ट्रिक्ट ३२५ जे को वर्ष २०२४/२५ की गभर्नर मिलन थापा, लियो मल्टिपल डिष्ट्रिक्ट काउन्सिलकी अध्यक्ष अस्मिता लामिछाने, लायन्स क्लब इन्टरनेशनल डिष्ट्रिक्ट ३२५ ए को वर्ष २००४/०५ की अध्यक्ष सुष्मा शर्मा र लायन्स क्लब इन्टरनेशनल डिष्ट्रिक्ट ३२५ एल को वर्ष २०२४/२५ की सेकेण्ड भाइस डिष्ट्रिक्ट गभर्नर तारा भुषालाई सम्मान गर्ने कार्यक्रम रहेको गभर्नर तुम्बाहाङ्फेले जानकारी दिनुभएको छ ।
