हेटौँडा ः मकवानपुर प्रहरीले लागूऔषध गाँजासहित २ जनालाई पक्राउ गरेको छ । आइतबार हेटौँडा–१९, नेवारपानीस्थित ईलाका प्रहरी कार्यालयबाट खटिएको प्रहरी टोलीले १५ किलो ६ सय ८० ग्राम लागूऔषध गाँजासहित मनहरी गाउँपालिका–३ का ४० वर्षीय बाबु बल भन्ने बहादुर बल र हेटौँडा–११ थानाभर्याङका १९ वर्षीय आशिष भन्ने सलमान गुरुङलाई पक्राउ गरेको हो ।
पूर्व–पश्चिम राजमार्गमा सवारी साधनहरु रोकेर सुरक्षाजाँच गर्दा नारायणगढबाट हेटौँडा हुँदै कोल्वीतर्फ जाँदै गरेको ना ५ ख ५१२९ नम्बरको यात्रुबाहक बसमा सवार बहादुर बल र सलमान गुरुङको साथबाट प्रहरीले गाँजा बरामद गरेको हो । दुबै जनालाई नियन्त्रणमा लिई मकवानपुर जिल्ला अदालतबाट ८ दिनको म्याद अनुमती लिई हिरासतमा राखेर अनुसन्धान गरिरहेको प्रहरीले जनाएको छ ।
