हेटौँडा ः हेटौँडामा जारी दोस्रो संस्करणको बागमती प्रदेश लिग फुटबल प्रतियोगितामा आज बिहीबार दोस्रो सेमीफाइनल खेल हुँदैछ । हेटौँडा–५ स्थित पिप्ले–क्याम्पा रंगशालामा हुने खेलमा काठमाडौंको चित्लाङ फुटबल क्लब र ललितपुर फुटबल क्लब भिड्नेछ ।
आजको खेलको विजेता टिमले शनिबार हुने फाइनल खेलमा दोलखाको टिमसँग प्रतिस्पर्धा गर्नुपर्नेछ । बुधबार भएको पहिलो सेमीफाइनल खेलमा दोलखाको टाइगर टिम तिखातालले सिन्धुलीको ब्लुअल्पाइन क्लबलाई २–१ गोलअन्तरले पराजित गरेको थियो । प्रतियोगितामा ११ जिल्लाको लिग विजेता टिमहरुको सहभागिता रहेको थियो ।
प्रतियोगिताको उपाधि विजेता टिमले दुई लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले एक लाख रुपैयाँसहित शिल्ड, मेडल तथा प्रमाणपत्र प्राप्त गर्नेछ । यस्तै, विधागत उत्कृष्ट खेलाडीहरुका लागि पनि पुरस्कारको व्यवस्था गरिएको छ ।
