हेटौंडाः हेटौंडा–६, चौघडास्थित सुनगाभा शिक्षा निकेतनले खेलकुद सप्ताह आयोजना गरेको छ । वार्षिक कार्यक्रम अनुसार सुनगाभाले सोमबारबाट खेलकुद सप्ताह कार्यक्रमको आयोजना गरेको हो । सोमबार विद्यालय व्यवस्थापन समितिका अध्यक्ष रामहरी न्यौपाने र प्रवन्ध निर्देशक षडानन्द चौलागाईंको सभाध्यक्षमा खेलकुद सप्ताहको उद्घाटन भएको थियो ।
खेलकुद सप्ताहमा कक्षा–नर्सरीदेखि कक्षा–९ सम्मका विद्यार्थीहरुको सहभागिता रहेको थियो । निलो सदन, रातो सदन, हरियो सदन र पहेँलो सदनबाट करिब ७ सय जना विद्यार्थी प्रतियोगितामा सहभागी छन् । प्रतियोगितामा फुटबल, भलिबल, व्याडमिन्टन, एथ्लेटिक्स, टग अफ वार, चकलेट दौड, शिक्षक विद्यार्थी भलिबल लगायतका खेलहरु सञ्चालन भएको प्रिन्सीपल अरुण पराजुलीले जानकारी दिनुभएको छ । खेलकुदको समापन बुधबार हुने प्रिन्सीपल पराजुलीले बताउनुभयो ।
