हेटौँडाः हेटौँडा काठमाडौं जोड्ने छोटो दुरीको सडक खुलाउन प्रहरी तैनाथ गरिएको छ । इलाका प्रहरी कार्यालय मातहतका प्रहरी प्रयोग गरी हेटौंडा काठमाडौं जोड्ने छोटो दुरीको हेटौंडा भीमफेदी कुलेखानी सिस्नेरी काठमाडौं तथा भीमफेदी कुलेखानी फाखेल काठमाडौं सडक खुलाउने प्रयत्न भइरहेको छ ।
जेसिवि र मेसिन प्रयोग गरेर ठुलो पहिरो पन्छाइदै गरिएको र स–साना पहिरो प्रहरीले पन्छाइरहेको इलाका प्रहरी कार्यालय भीमफेदीकी इन्चार्ज प्रहरी निरिक्षक ललिता ढकालले जानकारी दिनुभयो । सो सडकखण्डको विभिन्न स्थानमा साना–साना पहिरो खसेको र मेसिन आउन समय लाग्ने भएकाले प्रहरीले नै पन्छाउने काम भइरहेको उहाँले बताउनुभयो ।
उहाँका अनुुसार भीमफेदी बजारबाट माथिल्लो क्षेत्र जुरीखेतको २ स्थानमा पहिरोसहित रुख ढलेकाले सवारी आवागमन नै ढप्प भएको थियो । उक्त पहिरोका कारण पहिरो झरेका क्षेत्र अवलोकनमा समेत जान कठिनाइ भइरहेको उहाँले बताउनुभयो ।
सडकका साना पहिरो पन्छाउदै पहिरो झरेका स्थान अवलोकन गरिरहेको उहाँको भनाई छ । ठुला पहिरोहरु हटाउन मेसिन बेलाएर सडक खुलाउने काम भइरहेको उहाँले बताउनुभयो । सो सडकखण्डको फाखेल, सिस्नेरी क्षेत्रमा पहिरो खसेको उहाँले बताउनुभयो ।
