हेटौँडाः हेटौँडाबाट बारातर्फ जाँदै गरेको ट्रकबाट बारा जिल्ला प्रहरीले विशेष सूचनाको आधारमा लागुऔषध गाँजा बरामद गरेको छ । सोमबार साँझ ६ बजेको समयमा ईलाका प्रहरी कार्यालय अमलेखगञ्जबाट खटिएको प्रहरी टोलीले गाँजासहित ट्रकलाई नियन्त्रणमा लिएको हो ।
हेटौँडाबाट पथलैयातर्फ जाँदै गरेको ना ४ ख २०६३ नम्बरको ट्रकलाई बारा जिल्लाको जितपुर–सिमरा उपमहानगरपालिका वडा नम्बर–२१, अमलेखगञ्जमा रोकी सुरक्षाजाँच गर्दा ट्रकको क्याबिनमा फल्स बटम बनाई लुकाएर राखिएको १५ पोकामा दुई सय ४० किलो लागूऔषध गाँजा बरामद गरेको बारा जिल्ला प्रहरी कार्यालयले जानकारी दिएको छ ।
ट्रक चालक चितवन जिल्लाको राप्ती नगरपालिका वडा–३, झुरझुरेका २६ वर्षीय विज्ञान तिमल्सिना र सहचालक १८ वर्षीय बाबुकाजी परियारलाई नियन्त्रणमा लिएर आवश्यक कानुनी प्रक्रियालाई अगाडि बढाएको बताइएको छ ।
