हेटौँडाः तेस्रो संस्करणको रोटरी मकवानपुर पिप्ले क्याम्पा राष्ट्रिय भेट्रान्स फुटबल प्रतियोगिताअन्तर्गत आज मंगलबार दुई खेल हुँदैछ । पहिलो खेलमा सर्लाहीको हरिवन भेट्रान्स र घरेलु टोली हेटौँडा भेट्रान्सबीच प्रतिस्पर्धा हुनेछ भने दोस्रो खेलमा आयोजक रोटरी पिप्ले भेट्रान्स र बारा जिल्लाको निजगढ भेट्रान्सबीच प्रतिस्पर्धा हुनेछ ।
यसअघि उद्घाटन खेलमा साविक विजेता चितवन भेट्रान्सले नागस्वती भेट्रान्सलाई टाइब्रेकरमा ४–२ गोलअन्तरले पराजित गरेको थियो । निर्धारित समय १–१ गोलको बराबरीमा खेल सकिएपछि टाइब्रेकरमा धकेलिएको थियो ।
भदौ ३१ गतेसम्म सञ्चालन हुने प्रतियोगितामा १५ वटा टिमको सहभागिता रहेको छ । प्रतियोगिताको उपाधि विजेता टिमले दुई लाख दुई हजार दुई सय २२ रुपैयाँ र उपविजेता टिमले एक लाख एक हजार एक सय ११ रुपैयाँसहित शिल्ड, मेडल तथा प्रमाणपत्र प्राप्त गर्नेछन् । पहिलो र दोस्रो संस्करणको प्रतियोगिताको प्रथम पुरस्कार एक लाख रुपैयाँ र द्वितीय पुरस्कार ७५ हजार रुपैयाँ रहेको थियो । २०७२ र २०७३ सालमा सम्पन्न पहिलो र दोस्रो संस्करणको उपाधि चितवन भेट्रान्सले जितेको थियो ।
