हेटौंडाः लागुऔषध गाँजासहित ३ जनालाई मकवानपुर प्रहरीले पक्राउ गरेको छ । बिहिबार बिहान फरक–फरक समयमा हेटौँडा–१५ रातोमाटेबाट ३ जनालाई लागुऔषध गाँजासहित पक्राउ गरिएको जिल्ला प्रहरी कार्यालय मकवानपुरले जनाएको छ ।
प्रहरीले बिहिबार बिहान ५ बजेर ३० मिनेटको समयमा हेटौँडा–१५, राटोमाटे चेकपोष्टमा हेटौँडाबाट पथलैयातर्फ जाँदै गरेको प्रदेश ०३–००१ च २११६ नम्बरको स्कार्पियो गाडीलाई रोकेर सुरक्षाजाँच गर्ने क्रममा हेटौँडा–५ का ३४ वर्षीय बिनोद सेवा र गाडीमा सवार हेटौँडा–१३ की ३५ वर्षीया सुनिता तामाङलाई लागुऔषध गाँजा ३३ केजीसहित पक्राउ गरेको जिल्ला प्रहरी कार्यालय मकवानपुरले जानकारी दिएको छ ।
यस्तै बिहिबार बिहान १० बजेर ५ मिनेटको समयमा मकवानपुर प्रहरीले लागुऔषध गाँजा १८ किलो ५ सय ग्रामसहित एकजना भारतीय नागरिकलाई पक्राउ गरेको छ । पक्राउ पर्नेमा भारतको बेतिया जिल्लाका ३० वर्षीय मुसादेव आलम रहेका छन् । हेटौँडा–१५, राटोमाटेमा हेटौँडाबाट पथलैयातर्फ जाँदै गरेको बीआर ०५ पी बी ७३६४ नम्बरको अटोलाई रोकी सुरक्षाजाँच गर्ने क्रममा अटोको पछाडिको सिटमुनी लुगाएर राखिएको लागुऔषध गाजा प्रहरीले बरामद गरेको हो । प्रहरीले मकवानपुर जिल्ला अदालतबाट ७ दिनको म्याद लिई तीनैजनालाई हिरासतमा राखेर अनुसन्धान गरिरहेको छ ।
