हेटौंडाः हेटौंडा–९, लामसुरेस्थित सिआन पुनस्र्थापना केन्द्रलाई एक लाख रुपैयाँ राशिको पुरस्कार प्रदान गरिएको छ । लागूपदार्थ दुव्र्यसनविरुद्ध अन्तर्राष्ट्रिय दिवसको अवसरमा केन्द्रलाई नगद पुरस्कारसहित सम्मान गरिएको हो ।
बुधबार काठमाडौंको भद्रकालीस्थित नेपाली सेनाको मुख्यालयमा नेपाल सरकारका उपप्रधानमन्त्री एवम् गृहमन्त्री रवि लामिछानेले केन्द्रका निर्देशक सौजन डीसीलाई एक लाख रुपैयाँ नगद राशि र सम्मानपत्र प्रदान गर्नुभएको छ । लागूऔषध प्रयोगकर्ताहरुको उपचार तथा पुनस्र्थापनाका लागि आर्थिक वर्ष २०८०÷०८१ मा उत्कृष्ट संस्था बन्न सफल भएकाले नगद पुरस्कार र सम्मानपत्र प्रदान गरिएको केन्द्रका निर्देशक डीसीले बताउनुभयो ।
गृह मन्त्रालयले नेपालभरका पुनस्र्थापना केन्द्रहरुको अनुगमन गरेर लागूऔषध दुव्यर्सनी सचेतना, परामर्श, सरसफाई र स्वास्थ्यलाई मूल्यांकन गरेर हरेक वर्ष अन्तर्राष्ट्रिय लागूऔषध विरुद्धको दिवसको अवसरमा दुईवटा पुनस्र्थापना केन्द्रलाई सम्मान गर्ने गरेको निर्देशक डीसीले बताउनुभयो । लागूपदार्थ तथा मादकपदार्थमा फसेका व्यक्तिहरुलाई आवासीयरुपमा राखेर परामर्श र समाजमा पुनस्र्थापना सँगसँगै तरकारी बाली, गाईपालन, इलेक्ट्रिक, प्लम्बिङ र हस्तकलासम्बन्धी तालिम दिने गरेको उहाँले बताउनुभयो ।
गृहमन्त्री लामिछानेको प्रमुख आतिथ्य तथा गृहसचिव एकनारायण अर्यालको सभाध्यक्षतामा सम्मान समारोह भएको हो । सम्मान समारोहलाई सम्बोधन गर्नुहुँदै गृहमन्त्री लामिछानेले लागूऔषध दुव्र्यसन, सेवन र ओसारपसारलाई नियन्त्रण गर्न मन्त्रालयले आवश्यक कानुन बनाउने र ठोस कदम चाल्ने बताउनुभयो । कार्यक्रममा शिक्षामन्त्री सुमना श्रेष्ठ, युवा तथा खेलकुदमन्त्री विराजभक्त श्रेष्ठलगायतको विशिष्ट आतिथ्य रहेको थियो ।
