हेटौंडाः बागमती प्रदेशका आन्तरिक मामिला तथा कानुनमन्त्री गंगानारायण श्रेष्ठले खुला सिमानाका कारण लागूऔषध दुव्यर्सनी बढेको बताउनुभएको छ । बुधबार अन्तर्राष्ट्रिय लागूपदार्थ अवैध तस्करी विरुद्धको दिवसको अवसरमा जिल्ला प्रशासन कार्यालय मकवानपुर र जिल्ला प्रहरी कार्यालय मकवानपुरले आयोजना गरेको लागूपदार्थ दुव्र्यसनी विरुद्धको कार्यक्रमलाई सम्बोधन गर्नुहुँदै कानुनमन्त्री श्रेष्ठले खुला सिमानाका कारणले लागूपदार्थको ओसारपसार बढिरहेको भन्दै न्यूनीकरण गर्ने कार्यमा सबै लाग्नुपर्ने बताउनुभएको हो ।
स्थानीयस्तरमा घटेको घटनाहरुलाई बुझेर लागूऔषध दुव्यर्सनीलाई कम गर्न सबै जिम्मेवार बन्न आवश्यक रहेको उहाँले बताउनुभयो । समाजका मानिसहरुले किन लागूऔषधको सेवन गरिरहेका छन् ? भन्ने कुरा बुझेर घरपरिवारका सदस्यहरु जवाफदेही र जिम्मेवार बन्नुपर्ने उहाँले बताउनुभयो । लागूऔषध विरुद्ध सचेतनामूलक कार्यक्रम आयोजना गर्नका लागि बढी बजेट परिचालन गर्न आवश्यक रहेको उहाँको भनाइ छ ।
गाँजालाई नशाका लागि भन्दा पनि औषधीको रुपमा प्रयोग गर्नुपर्ने उहाँले बताउनुभयो । मानिसहरुले यसलाई किन व्यवसायको रुपमा प्रयोग गरिरहेका छन् भन्ने कुरालाई बुझेर कानुनीरुपमा नियमन गर्नुपर्ने उहाँको भनाइ छ । लागूऔषध दुव्र्यसनी न्यूनीकरण गर्न विद्यालयस्तरबाट नै सचेतनामूलक कार्यक्रम गर्न आवश्यक रहेको उहाँले औँल्याउनुभयो । प्रदेश सरकारमार्फत् आगामी आर्थिक वर्ष २०८१/०८२ मा चालु आर्थिक वर्ष २०८०/८१ भन्दा बढी बजेट विनियोजन गरिने उहाँले बताउनुभयो ।
एकीकृत र केन्द्रिकृतरुपमा परिवार, समाज सबैले आफ्नो दायित्व पूरा गर्नुपर्ने उहाँको भनाइ छ । किशोरकिशोरी तथा युवायुवतीमा यसको नकारात्मक असर बढी देखिने भएकाले सबै युवाहरु निडर भएर यसको न्यूनीकरणका लागि पहल गर्नुपर्ने उहाँले बताउनुभयो । विद्यालयका बालबालिकाहरुले समाज, प्रदेश, देशमा लागूऔषधको कारण बढेको नकारात्मक घटनालाई बुझेर र आफ्नो भविष्यको बारेमा चिन्ता गरेर यसबाट टाढा रहन आवश्यक रहेको उहाँले दावी गर्नुभयो ।
मकवानपुरका प्रमुख जिल्ला अधिकारी तीर्थबहादुर चिलुवालले विसं २०७६ सालको तथ्यांक अनुसार धेरै मानिसहरु लागूऔषध दुव्र्यसनीमा फसेको बताउनुभयो । मकवानपुर जिल्लाको सन्दर्भमा बढी मात्रामा लागूऔषधको सेवन र ओसारपसारका कारण भीमफेदी कारगारमा कैदीहरुको संख्या बढिरहेको उहाँले बताउनुभयो । लागूऔषधका कारण कार्यस्थलमा मात्र नभई परिवारमा पनि नकारात्मक असर परिरहेको उहाँले बताउनुभयो ।
प्रदेश, स्थानीय र संघीय सरकारले यस विषयमा अनुसन्धान गरेर शिक्षक र विद्यार्थीहरुबीचको कार्यक्रमलाई प्रभावकारी बनाउन आवश्यक रहेको उहाँले औँल्याउनुभयो । प्रदेश सरकार र राज्यले यसको विषयमा राम्ररी अनुसन्धान गरेमा यसलाई न्यूनीकरण गर्न सकिने उहाँले दावी गर्नुभयो । मासिनहरु यसको कुलतमा फसेका कारण राज्यले थुप्रै कुराहरु गुमाउनुपरेको बताउनुहुँदै यसको कारणले व्यक्तिगत व्यवहारमा नकारात्मक परिवर्तन आएको उहाँको धारणा छ ।
कानुनमन्त्री श्रेष्ठको प्रमुख आतिथ्य तथा प्रमुख जिल्ला अधिकारी चिलुवालको सभाध्यक्षमा भएको कार्यक्रममा जिल्ला समन्वय समिति मकवानपुरका प्रमुख ललित घलान, हेटौंडा उपमहानगरपालिकाकी प्रमुख मीनाकुमारी लामालगायतको आतिथ्य रहेको थियो । कार्यक्रमम विभिन्न विद्यालयका विद्यार्थीहरुको पनि सहभागिता रहेको थियो ।
