हेटौंडाः मकवानपुरका गैससकर्मी कृष्ण धितालका छोरा अनुज धितालको पनि मृत्यु भएको छ । चितवनस्थित पुरानो मेडिकल कलेजमा उपचाररत अनुजको आज बिहान मृत्यु भएको हो । कृष्ण धितालसहित परिवार सवार जीप सोमबार साँझ मुग्लिन–नारायणगढ सडकखण्डको १७ किलो भन्ने स्थानमा दुर्घटना भएको थियो ।
दुर्घटनामा घाइते हुनुभएकी धितालकी श्रीमती प्रभा धिताल गौतमको उपचारका लागि अस्पताल लैजाने क्रममा सोमबार साँझ बाटोमै मृत्यु भएको थियो । स्कोर्पियो जीपमा काठमाडौंबाट हेटौंडातर्फ आउने क्रममा भारतीय नम्बरको भारतीय ग्यास बुलेटसँग ठोक्किएर सोमबार साँझ ५ बजेर ५० मिनेट जाँदा दुर्घटना भएको चितवन प्रहरीले जनाएको छ ।
दुर्घटनमा परी चालक राजन घिमिरे गम्भीर घाइते छन् । यस्तै कृष्ण धिताल र छोरी वर्षा धिताल मध्यम अवस्थामा रहेको चितवन प्रहरीले जनाएको छ । धिताल परिवार सवार बा १३ च ५९२९ नम्बरको स्कर्पियो नारायणगढबाट मुग्लिङतर्फ जाँदै गरेको एनएल ०१०५१६० नम्बरको भारतीय नम्बरको ग्यास बुलेटसँग ठोक्किएर दुर्घटना भएको हो ।
