हेटौंडाः हेटौंडा–४, पारिजातपथस्थित सिटिजन्स बैंकको १७ औँ वार्षिक उत्सवको अवसरमा रक्तदान भएको छ । शुक्रबार बिहान भएको रक्तदान कार्र्यक्रममा ३२ जनाले रक्तदान गरेका हुन् ।
कार्यक्रममा २८ जना पुरुष र ४ जना महिलाले रक्तदान गरेका छन् । रक्तदान कार्यक्रममा रक्तसञ्चार केन्द्र हेटौंडाको प्राविधिक सहयोगमा भएको केन्द्रका प्राविधिक किशोर सापकोटाले जानकारी दिनुभएको छ ।
शनिबार बिहान हेटौंडा–१० स्थित बुद्धचोकमा गोर्खा सरकारी संस्थाको अयोजनामा र बैशाख १८ गते एसियन पेन्ट्सको आयोजनामा रक्तदान कार्यक्रम हुने प्राविधिक सापकोटाले बताउनुभयो । यसअघि मंगलबार हेटौंडा–१० स्थित वनविज्ञान क्याम्पसको र बुधबार नेपाल प्रहरी श्रीमती संघ बागमती प्रदेशको आयोजनामा रक्तदान कार्यक्रम भएको थियो ।
