हेटौंडाः बागमती प्रदेश खेलकुद विकास परिषद्को आयोजनामा जारी अन्तर प्रदेश राष्ट्रिय खेलकुद प्रतियोगिताअन्तर्गत् पुरुष फुटबल प्रतियोगिताको सोमबार भएको खेलमा कर्णाली प्रदेश विजयी भएको छ । हेटौंडा–६ स्थित गौरीटार रंगशालामा भएको खेलमा लुम्बिनी प्रदेशलाई टाइबे्रकरमा ४–२ गोल अन्तरले हराउँदै कर्णाली प्रदेशले विजयी सुरुवात गरेको हो ।
निर्धारित समयमा २–२ गोलको बराबरीमा रोकिएर खेल टाइब्रेकरमा पुगेको थियो ।कर्णाली प्रदेशबाट पहिलो हाफको १६ औँ मिनेटमा एक गोल गर्दै सुवस वमले पहिलो अग्रता दिलाएका थिए । लुम्बिनी प्रदेशबाट दोस्रो हाफमा १५ औँ मिनेटमा रोहित सुनुवारले एक गोल गर्दै खेललाई बराबरीमा ल्याएका हुन् । दोस्रो हाफकै २६ मिनेटमा दीपकराज सिंहले एक गोल गर्दै अग्रतालाई बढाएका थिए । कर्णालीबाट फ्री किकको सदुपयोग गरेर कारण राउतले एक गोल गर्दै खेललाई बराबरीमा ल्याएका थिए । प्रतियोगिताको म्यान अफ द म्याच प्रवेश बुढाथोकी घोषित भएका छन् ।
प्रतियोगितामा ७ प्रदेशको टिम सहभागी रहेको छ । प्रतिगितामा प्रथम, द्वितीय र तृतीय हुनेले शिल्ड, मेडल तथा प्रमाणपत्र प्राप्त गर्नेछन् । फाइनल खेल बैशाख ४ गते हुनेछ । यसअघि सोमबार भएको पहिलो खेलमा मधेश प्रदेशलाई २–० गोल अन्तरले हराउँदै कोशी प्रदेशले विजयी सुरुवात गरेको थियो भने गण्डकी प्रदेशलाई टाइब्रकेरमा ३–१ गोल अन्तरले हराउँदै सुदूरपश्चिम प्रदेशले विजयी सुरुवात गरेको थियो ।
