हेटौंडाः राष्ट्रिय संगीतकर्मी संघ मकवानपुरको आयोजनामा हेटौंडामा एकल गायन प्रतियोगिता हुने भएको छ । मंगलबार हेटौंडामा पत्रकार सम्मेलनको आयोजना गर्दै संघका अध्यक्ष अजित लोप्चनले एकल गायन प्रतियोगिता आयोजना गर्न लागिएको जानकारी गराउनुभयो ।
समाजमा लुकेर बसेका प्रतिभालाई बाहिर ल्याउने उद्देश्यले खुला एकल गायन प्रतियोगिता आयोजना गर्न लागिएको आयोजकको भनाइ छ । प्रतियोगितामा जुनसुकै स्थानका मानिसले पनि सहभागिता जनाउन पाउने आयोजकले जनाएको छ । एकल गायन प्रतियोगिता बैशाख ११, १२ र १३ गते हुन लागेको हो ।
प्रतियोगितामा ६० जनाले सहभागिता जनाउने आयोजकको अनुमान छ । आयोजकले प्रतियोगितामा सहभागिता जनाउनका लागि प्रतियोगीले एक हजार रुपैयाँ शुल्क बुझाउनु पर्नेछ । गायन प्रतियोगिता पहिलो, दोस्रो र तेस्रो गरी ३ चरणमा हुनेछ । प्रतियोगितामा पहिलो, दोस्रो, तेस्रो र उत्कृष्ट २ जना गायकलाई क्रमशः २० हजार, १५ हजार, १० हजार र २ हजार ५ सय नगद पुरस्कारको व्यवस्था गरेको छ ।
