हेटौँडाः हेटौँडामा जारी चौथो संस्करणको हेटौँडा मेयर कप फुटबल प्रतियोगिताअन्तर्गत् आइतबार भएको पहिलो खेलमा हेटौंडा–१० विजयी भएको छ । हेटौंडा–५ स्थित पिप्ले क्याम्पा रंगशालामा भएको खेलमा ५ नम्बर वडालाई ४–२ गोल अन्तरले हराउँदै वडा–१० ले विजयी सुरुवात गरेको हो ।
आइतबार भएको दोस्रो खेलमा १४ नम्बर वडा विजयी भएको छ । ८ नम्बर वडालाई १–० गोल अन्तरले हराउँदै वडा–१४ ले विजयी सुरुवात गरेको हो । प्रतियोगिताअन्तर्गत् सोमबार पहिलो खेलमा वडा नम्बर ४ र वडा नम्बर ६ बीच प्रतिस्पर्धा हुनेछ भने दोस्रो खेलमा वडा नम्बर १२ र वडा नम्बर ९ बीच प्रतिस्पर्धा हुनेछ ।
नगर खेलकुद विकास समितिका आयोजना तथा हेटौंडा उपमहानगरपालिकाको आर्थिक सहयोगमा सुरु भएको प्रतियोगितामा हेटौंडा उपमहानगरका १९ वटै वडाको सहभागिता रहेको छ । प्रतियोगिताको उपाधि विजेता टिमले दुई लाख रुपैयाँ र उपविजेता टिमले एक लाख ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै, प्रतियोगितामा तृतीय हुनेले ५० हजार रुपैयाँ र चौथो हुने टिमले २५ हजार रुपैयाँ प्राप्त गर्नेछन् भने विधागत उत्कृष्ट खेलाडीहरुका लागि पनि पुरस्कारको व्यवस्था गरिएको छ । प्रतियोगिताको फाइनल खेल बैशाख ४ गते हुनेछ । प्रतियोगिता आयोजनाका लागि उपमहानगरपालिकाबाट १५ लाख रुपैयाँको बजेट बिनियोज भएको छ ।
