हेटौँडाः बारा जिल्लाको जीतपुर–सिमरा उपमहानगरपालिका–२१, अमलेखगन्जबाट प्रहरीले लागुऔषध ओनरेक्ससहित हेटौँडाका २ जनालाई पक्राउ गरेको छ । पक्राउ पर्नेमा हेटौँडा–१३ बस्ने २४ वर्षीय शुभराज मोक्तान र हेटौँडा–४ का २२ वर्षीय निरज गोले रहेको बारा प्रहरीले जानकारी दिएको छ ।
विशेष सूचनाको आधारमा सोमबार दिउँसो ४ बजेर ३० मिनेटको समयमा ईलाका प्रहरी कार्यालय अमलेखगन्ज र प्रहरी चौकी पथलैया बाराबाट खटिएको संयुक्त प्रहरी टोलीले वीरगन्जबाट हेटौँडातर्फ आउँदै गरेको ना ४३ प २०२ नम्बरको मोटरसाइकललाई शंका लागी सुरक्षाजाँच गर्दा लागुऔषध बरामद गरेको थियो । प्रहरीले मोटरसाइकलको पेट्रोल ट्याङ्कीभित्र लुकाई छिपाई राखेको अवस्थामा १ सय एमएल बराबरको ३९ बोत्तल लागुऔषध ओनरेक्स फेला पारेको थियो । लागुऔषध ओनरेक्ससहित दुबै जनालाई नियन्त्रणमा लिई बारा जिल्ला अदालतबाट ५ दिन म्याद थप गरी अनुसन्धान कार्य भइरहेको प्रहरीले जानकारी दिएको छ ।
