हेटौंडाः आज बिहीबारबाट देशैभर एकैसाथ माध्यमिक शिक्षा परीक्षा (एसईई) सुरु हुँदैछ । मकवानपुरका सम्पूर्ण विद्यालयमा एसईई परीक्षाको तयारी पूरा भएको विद्यालयहरुले जनाएका छन् ।
एसईई परीक्षा बिहान ८ बजेदेखि ११ बजेसम्म सञ्चालन हुनेछ । बिहीबारबाट सुरु भएको परीक्षा साधारण धारको चैत २३ गते र प्राविधिक धारको चैत २७ गते मंगलबार सकिनेछ । मकवानपुर जिल्लाका सबै परीक्षा केन्द्रका लागि केन्द्राध्यक्ष नियुक्ति, सुरक्षा व्यवस्था, जनशक्ति परिचालन, प्रश्नपत्र र उत्तरपुस्तिका पुर्याउनेलगायतका सबै काम सकिएको छ ।
यसवर्ष मकवानपुर जिल्लाका एक सय ३८ विद्यालयबाट ६ हजार एक सय ५६ जना विद्यार्थीले एसईईको परीक्षा फारम भरेका छन् । मकवानपुर जिल्लामा एसईईका लागि २६ वटा परीक्षा केन्द्र रहेको छ । हरेक विद्यालयमा सिट प्लानिङको कार्य सकिएको छ ।
