हेटौँडाः अघिल्लो साता मात्रै बारा जिल्लाको डुमरवानामा उपाधि जितेको मकवानपुर क्रिकेट टिमले आज आइतबारदेखि बारा जिल्लाकै जितपुर–सिमरा उपमहानगरपालिकामा चौथो हरपुर च्याम्पियनसीप ट्रफी क्रिकेट प्रतियोगिता खेल्दैछ । आज उद्घाटन खेलमा मकवानपुरले कलैया क्रिकेट क्लबसँग खेल्नेछ ।
हरपुर क्रिकेट क्लबको आयोजनमा हुन लागेको टि–२० प्रतियोगितामा ६ वटा टिमको सहभागिता रहेको छ । सहभागी टिमलाई दुईवटा समूहमा विभाजन गरी लिग कम नकआउट प्रणालीमा प्रतियोगिता आयोजना गरिएको छ । मकवानपुर, कलैया र युथ क्रिकेट क्लब समूह ए मा रहेको छ भने समूह बीमा आयोजक हरपुर क्रिकेट क्लबसँगै चितवन क्रिकेट र बीरगन्जको नेशनल एन्फोटेक कलेजको टिम रहेको छ ।
मकवानपुरले सुमन सुनारको कप्तानीमा हरपुर ट्रफीमा सहभागिता जनाउँदै छ । मकवानपुरको क्रिकेट टिममा, गौरब खड्का, शुभ कंशकार, आस्तिक दाहाल, विशाल फुयाँल, सक्षम बास्ताकोटी, इरफान अली, राम नरेश गिरी, रोहित ठाकुर, असिम श्रेष्ठ, समिर चौलागाई, सूवर्ण भट्ट, युनिश थापा र पियुष शर्मा समावेश छन् । समूह चरणमा प्रथम र दोस्रो स्थानमा रहने टिम सेमीफाइनल प्रवेश गर्नेछ । प्रतियोगिताको फाइनल खेल आगामी शनिबार हुनेछ ।
