हेटौँडाः मकवानपुरको मनहरी गाउँपालिका–८, सिम्पानीस्थित महेन्द्र किरण माविको प्रधानाध्यापक (प्रअ) मा कविता लामा नियुक्त हुनुभएको छ । विद्यालय व्यवस्थापन समितिको मंगलबार बसेको बैठकले लामालाई प्रधानाध्यापकको जिम्मेवारी दिएको हो । यसअघिका प्रधानाध्यापक शिव बहादुर रिजालले राजिनामा दिनुभएपछि मावि अंग्रेजी विषयकी स्थायी शिक्षक लामालाई प्रधानाध्यापकको जिम्मेवारी दिइएको हो ।
२०७१ सालमा निमावि तहको शिक्षकको स्थायी नियुक्ति पाउनुभएकी लामाले २०७५ सालमा मावि तहको परीक्षा उत्तीर्ण गर्नुभएको थियो । मावि तहमा बकैया गाउँपालिका–१२, मन्थलीस्थित प्रसिद्ध माविमा ३ वर्ष सेवा गर्नुभएपछि २०७८ सालमा लामा महेन्द्र किरण माविमा सरुवा भएर आउनुभएको थियो ।
विद्यालयको नेतृत्व गर्ने अवसरलाई उपयोग गर्दै विद्यालयको सकारात्मक परिवर्तनमा आफू सक्रिय रहने नवनियुक्त प्रधानाध्यापक लामाको भनाइ छ । विद्यालयका सरोकारवालासँगको सहकार्य र समन्वयका काम गर्ने लामाले बताउनुभएको छ । १२ कक्षासम्म पठनपाठन हुने विद्यालयमा आठ सयभन्दा बढी विद्यार्थी अध्ययनरत छन् ।
