हेटौंडाः मकवानपुरको अग्रणी साहित्यिक संस्था झरना साहित्यिक परिवार (झसाप) मकवानपुरको आयोजनामा बदामसँग कविता कार्यक्रम सम्पन्न भएको छ । झसापको २९८ औँ साहित्य शृङ्खलाका अवसरमा शुक्रबार हेटौंडा–१७ मा रहेको जुरेथुम पर्यटकीय पार्कमा कार्यक्रम भएको हो ।
कार्यक्रममा करिब तीन दर्जन सर्जकहरुले बदाम र सुन्तला खाँदै कविता वाचन गर्नुभएको संस्थाका अध्यक्ष विश्वनाथ सञ्जेलले जानकारी दिनुभयो । कार्यक्रमका प्रमुख अतिथिको रुपमा मन्तव्य राख्नुहुँदै नियात्राकार निर्मोही व्यासले यात्राले काव्य लेखनमा सहजता प्रदान गर्ने बताउनुभयो । उहाँले झरना साहित्यिक परिवारले राम्रो काम गरिहेकोमा संस्थाको प्रशंसा गर्नुभयो ।
कार्यक्रममा संस्थाका संरक्षक रमेशमोहन अधिकारी, सल्लाहकार दीपक गौतम, साहित्यकार समिर पाख्रिन, पुरुषोत्तम आचार्य, डीबी बर्तौला, सानु खनाल, सुवास खनाल, भावना सापकोटा, बैकुण्ठ लामिछाने, सागर तिमल्सिना, सुबास सजल, किशन पोडेल, गोकर्ण लामा, स्वस्तिका बानियाँ, देव निर्दोष, गायत्री रुपाखेती, विश्व राई, सन्तराम राई, अजर फुयाँल, ओमभक्त भण्डारीलगायत सर्जकहरूले रचना बाचन गर्नुभएको थियो । कार्यक्रममा संस्थाका संरक्षक उद्धवप्रसाद सापकोटा, सिस्नुपानी मकवानपुरका अध्यक्ष राजकुमार लामिछाने, मुक्तककार मिथिला अधिकारी, साहित्य संगम मकवानपुरका कोषाध्यक्ष मेनु तिमल्सिनालगायतको आतिथ्य रहेको थियो ।
कार्यक्रममा झरना साहित्यिक परिवारले प्रकाशन गर्दै आएको झरना साहित्यिक अर्धवार्षिक पत्रिका ‘झरना’को ४० औँ अङ्क पनि विमोचन गरिएको थियो । कार्यक्रमको अध्यक्षता संस्थाका अध्यक्ष सञ्जेलले गर्नुभएको थियो भने सहजीकरण संस्थाका सचिव मसान उपासकले गर्नुभएको थियो ।
झरना साहित्यिक परिवार मकवानपुरले हरेक महिना नियमित साहित्य शृङ्खला गर्दै आएको छ । संस्थाले आगामी महिना बकैया गाउँपालिकामा विद्यार्थीहरूका लागि चित्रकला तथा हस्तकलासम्बन्धी प्रशिक्षण कार्यक्रम सञ्चालन गर्ने संस्थाका सहसचिव सन्तराम राईले बताउनुभयो ।
