हेटौंडाः हेटौंडा उपमहानगरपालिका–७ स्थित तासिर इंग्लिस सेकेण्डरी स्कुलको आयोजनामा भएको पाँचौं संस्करणको “रण बहादुर थापा” स्मृति हाजिरीजवाफ प्रतियोगितामा जिएस निकेतन प्रथम भएको छ ।चौथो संस्करणमा पनि जिएस निकेतन नै प्रथम भएको थियो ।
प्रतियोगितामा जनप्रिय मावि द्वितीय भयो भने जेम्स स्कुल तृतीय भएको छ । प्रतियोगितामा प्रथम, द्वितीय र तृतीय हुने विद्यालयले क्रमशः १० हजार १ सय ५५ रुपैयाँ, ७ हजार १ सय ५५ रुपैयाँ र ५ हजार १ सय ५५ रुपैयाँ नगदसहित शिल्ड, मेडल र प्रमाणपत्र प्राप्त गरेको छ । प्रतियोगिता तासिर इङ्लिस सेकेण्डरी बोर्डिङ स्कुल व्यवस्थापन समितिका अध्यक्ष मिठे बहादुर कार्कीको सभाध्यक्षता तथा प्रथम बागमती प्रदेश मन्त्री डोरमणि पौडेलको प्रमुख आतिथ्यमा सम्पन्न भएको हो ।
प्रतियोगितामा ७ नम्बर वडाका वडा अध्यक्ष दामोदर गौतम, स्वर्गीय रण बहादुर थापाकी श्रीमती नीरकुमारी थापा, स्कुलका संस्थापक राजन थापा, विद्यालयका प्रिन्सीपल बिनोद शर्मा थपलिया, विद्यालयका क्रियाकलाप संयोजक सरल गौतम लगायत शिक्षक, विद्यार्थीको उपस्थिति रहेको थियो ।
