हेटौँडाः लागुऔषध गाँजासहित मकवानपुर प्रहरीले २ जना भारतीय नागरिकलाई पक्राउ गरेको छ । सोमबार बिहान १० बजेर ४० मिनेटको समयमा पूर्वपश्चिम राजमार्गअन्तर्गत हेटौँडा–१५, रातोमाटेस्थित प्रहरी चेकपोष्टबाट प्रहरीले ४५ किलो १२० ग्राम गाँजासहित २ जनालाई पक्राउ गरेको हो ।
हेटौँडाबाट बीरगन्जतर्फ जाँदै गरेको डीएल ४३ एनबी ५९९४ नम्बरको भारतीय बोलेरो गाडीलाई रोकी सुरक्षाजाँच गर्ने क्रममा गाँजा बरामद भएको प्रहरीले जनाएको छ । प्रहरीले बोलेरो गाडीका चालक भारतको बिहार राज्य मोतिहारी जिल्ला पूर्वि चम्पारणका २४ वर्षीय भुषण कुमार र बोलेरोमा सवार २१ वर्षीय साजन सिंहलाई पक्राउ गरेको छ । प्रहरीले लागुऔषध गाँजासहित भुषण कुमार र साजन सिंहलाई हिरासतमा राखी अनुसन्धान गरिरहेको जनाएको छ ।
