हेटौंडाः चितवन जिल्लाको भरतपुर महानगरपालिका–१५, पर्वतचोकमा कारले मोटरसाइकललाई ठक्कर दिँदा एकजनाको मृत्यु भएको छ । मृत्यु हुनेमा भरतपुर महानगरपालिका–२६, पटिहानीका ४० वर्षीय लक्ष्मी तिमल्सिना रहेको बागमती प्रदेश प्रहरी कार्यालय हेटौंडाले जानकारी दिएको छ ।
मंगलबार बेलुका ७ बजेको समयमा बी एबी १८९८ नम्बरको कारले ना ६४ प ६४७५ नम्बरको मोटरसाइकललाई ठक्कर दिँदा तिमल्सिना घाइते भएका थिए । घाइते तिमल्सिनालाई उपचारका लागि भरतपुर अस्पतालमा लगिएकोमा थप उपचारका लागि नयाँ मेडिकल कलेज भरतपुर रिफर गरिएको थियो । बिहिबार दिउँसो २ बजेर ४५ मिनेटको समयमा उपचारको क्रममा तिमल्सिनाको मृत्यु भएको प्रहरीले जानकारी दिएको छ । कार चालक ललितपुर जिल्ला बस्ने २६ वर्षीय जसुवा परियारलाई प्रहरीले नियन्त्रणमा लिएको छ ।
