हेटौँडाः सुदर्शन घिमिरे स्मृति यु–२१ हेटौँडा च्यालेन्ज कप फुटबल प्रतियोगिता–२०८० को खेल तालिका सार्वजनिक भएको छ । आयोजक हेटौँडा स्पोर्टस् मुण्डियालले शनिबार खेल तालिका सार्वजनिक गर्दै उद्घाटन खेलमा बारा जिल्लाको सिमरास्थित नव जनजागृति युवा क्लब र हेटौँडा–७ नागस्वतीस्थित नागस्वती युवा क्लबबीच खेल हुने जनाएको छ ।
मंसिर ५ गतेबाट हेटौँडा–५ स्थित पिप्ले–क्याम्पा रंगशालामा आयोजना हुने प्रतियोगिताको फाइनल खेल मंसिर १३ गते हुनेछ । १४ वटा टिमको सहभागिता रहेको प्रतियोगिताको विजेताले एक लाख ११ हजार एक सय ११ रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले नगद ५५ हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले नगद १५ हजार रुपैयाँ प्राप्त गर्नेछन् । प्रतियोगिताबाट बचत भएको रकम जाजरकोट भूकम्प पीडितहरुका लागि सहयोग गरिने जनाएको छ ।
