हेटौंडाः ६८ औं प्रहरी दिवस २०८० बागमती प्रदेश प्रहरी कार्यालय हेटौंडाले विभिन्न कार्यक्रमको आयोजना गरी मनाएको छ । शुक्रबार कार्यालय परिसरमा प्रहरी कर्मचारीहरु तथा प्रहरी कार्यालय सहयोगी कर्मचारीहरुसँग अन्तरक्रिया कार्यक्रम र हेटौंडाको मुख्य चोक बुद्धचोकमा म्यूजिक थेरापी कार्यक्रमको आयोजना गरिएको हो ।
बागमती प्रदेश प्रहरी कार्यालयका प्रमुख प्रहरी नायब महानिरीक्षक किरण राणाको प्रमुख आतिथ्यमा भएको कार्यक्रममा बागमती प्रदेश प्रहरी गण हेटौंडा, नेपाल प्रहरी विशेष सुरक्षा गण रातोमाटे, जिल्ला प्रहरी कार्यालय मकवानपुर, बागमती प्रदेश प्रहरी विपद् व्यवस्थापन गुल्म हेटौंडा र जिल्ला ट्राफिक प्रहरी कार्यालय मकवानपुरमा कार्यरत महिला प्रहरी कर्मचारीहरु र प्रहरी कार्यालय सहयोगी कर्मचारीहरुसँग अन्तरक्रिया कार्यक्रम भएको थियो । अन्तरक्रिया कार्यक्रममा प्रहरी कर्मचारी तथा प्रहरी कार्यालय सहयोगी कर्मचारीहरुले राखेका समस्या तथा गुनासोहरुलाई प्रमुख राणाले सम्बोधन गर्नुभएको थियो ।
बुद्धचोकमा भएको म्यूजिक थेरापी कार्यक्रममा प्रदेश प्रहरीको व्याण्ड टोलीले विभिन्न धुनमा व्याण्डबाजा बजाएको थियो ।
