हेटौंडाः मकवानपुर प्रहरीले ठूलो परिमाणमा विभिन्न लागूऔषध नष्ट गरेको छ । मंगलबार जिल्ला प्रहरी कार्यालय मकवानपुरका प्रहरी प्रवक्ता प्रहरी नायब उपरीक्षक लक्ष्मी भण्डारीको कमाण्डमा टोली खटेर विभिन्न मितिमा बरामद भएको ७ सय ११ केजी गाँजा नष्ट गरेको हो ।
लागूऔषध गाँजासहित वनरेक्स ५ सय ४० बोतल, डाइजेपाम ९ सय १६ एम्पुल, फेनारगन ८ सय ८५ एम्पुल र नुर्फिन ६ सय ९३ एम्पुल पनि नष्ट गरेको छ । उक्त लागूऔषधहरुलाई राप्ती खोलामा लगेर जलाएर नष्ट गरिएको हो ।
केही महिना अघिमात्र मकवानपुर प्रहरीले ठूलो परिमाणमा विभिन्न लागूऔषधहरु जलाएर नष्ट गरेको थियो । गत आर्थिक वर्षमा मकवानपुर प्रहरीले ६ हजार २५ केजी गाँजा, २१ केजी चरेश, १४ केजी अफिम र नाइट्रोभेट १ हजार ३ सय ५३ ट्याब्लेट बरामद गरेको थियो ।
