हेटौंडाः पत्रकार महासंघ मकवानपुर जिल्ला शाखाले जिल्लाका विभिन्न सञ्चार माध्यममा कार्यरत पत्रकार र कर्मचारीको तलब दिन सञ्चार माध्यम सञ्चालकहरुको ध्यानाकर्षण गराएको छ । कोरोना भाइरसको संक्रमणको जोखिम न्यूनीकरण गर्न मुलुकमा लकडाउन भएसँगै मकवानपुरका छापा माध्यम अधिकांश बन्द रहेका छन् भने रेडियो, टेलिभिजन र अनलाइन पत्रिका निरन्तर सञ्चालनमा रहेका छन् ।
अधिकांश सञ्चार माध्यममा कार्यरत पत्रकार र कर्मचारीले पारिश्रमिक नपाएको गुनासो पत्रकार महासंघमा परेपछि महासंघले महासंघका कोषध्यक्ष सुदीप शिवाकोटीको संयोजकत्वमा अनुगमन तथा समस्या समाधान समिति गठन गरेको छ । उक्त समितिले पारिश्रमिक नपाएका सञ्चार माध्यमहरुलाई ध्यानाकर्षण गर्ने र चैत्र महिनासम्मको पारिश्रमिक यो सातासम्म दिन आग्रह गरेको छ । जेठ १४ गते बसेको महासंघको कार्यसमितिको बैठकले ७ दिनभित्र चैत्रमहिनासम्मको पारिश्रमिक दिन संञ्चार माध्यमहरुलाई ध्यानाकर्षण गराएको छ ।
यस्तै वर्षौदेखि कार्यरत पत्रकार र कर्मचारीहरुलाई विपद्मा बेतलबी बिदामा राख्ने, सञ्चार माध्यम बन्द भई घरमै बसेकाहरुलाई तलब नदिने घटनाप्रति महासघंले घोर भत्सर्ना गरेको छ । महासंघले यस्तो घडिमा उनीहरुलाई नपन्छाउन पनि अनुरोध गरेको छ । पत्रकार र कर्मचारीहरुलाई तत्काल पारिश्रमिक उपलब्ध नगराए महासंघले रचनात्मक आन्दोलन गर्न बाध्य हुनेसमेत जनाएको छ ।
