हेटौँडाः पुर्वी मकवानपुरको बागमती गाउँपालिका–५, सिक्रे दोभानमा पहिरोमा परी बेपत्ता भएका एक जनाको शव फेला परेको छ । बुधबार बिहान ९ बजेर २० मिनेटको समयमा घटनास्थलबाट १० किलोमिटर तल बागमती खोलाको बगरमा २२ वर्षीया शिला पहरीको शव फेला परेको हो ।
यसअघि प्रहरीले पहिरोमा परी बेपत्ता रहेका ६० वर्षीय बुबा अक्कलबहादुर स्याङ्तनको शव फेला परेको जनाएको थियो । तर पछिल्लो जानकारी अनुसार अक्कलबहादुरको शव अझै फेला नपरेको प्रहरीले जनाएको छ । उक्त पहिरोमा परेका अक्कल बहादुर स्याङ्तानसहित २५ वर्षीय जीवन पहरी, ४ वर्षीय मिलन पहरी र आन्दाजी डेढ वर्षीया दिव्या पहरी अझै बेपत्ता छन् ।
मंगलबार बिहान आएको पहिरोमा परेकी ५५ वर्षीया सन्तमाया स्याङ्तानको भने उपचारको क्रममा मृत्यु भएको थियो । यस्तै पहिरोमा परी बेपत्ता भएका १७ वर्षीय पासाङ घिसिङको भने मंगलबार दिउँसो ४ बजेतिर घाइते अवस्थामा उद्धार गरिएको थियो । घिसिङको अहिले हेटौंडामा उपचार भइरहेको छ ।
