हेटौंडाः मकवानपुर प्रहरीले लागुऔषधसहित ३ जना भारतीय नागरिकलाई पक्राउ गरेको छ । शुक्रबार राती ११ बजेर २० मिनेटको समयमा भैरहवा हुँदै भारत सितामढी जाँदै गरेको डीएल ८ सीएअफ ५८३७ नम्बरको भारतीय कारलाई हेटौंडा–१५, रातोमाटेस्थित चेकपोष्टमा सुरक्षाजाँच गर्दा २ लाख ८० हजार रुपैयाँ बराबरको लागुऔषध फेला पारी उनीहरुलाई पक्राउ गरेकोे हो ।
पक्राउ पर्नेमा कार चालक भारतको बिहार मौजफपुर रामनगर ग्रामका ३५ वर्षीय चन्दन साह, बिहार सितामढीका २४ वर्षीय सुनिल कुमार र सोही ठाउँका ४० वर्षीय रतन साह रहेको प्रदेश प्रहरी कार्यालय हेटौंडाले जानकारी दिएको छ । उनीहरुको साथबाट ब्लेंडर प्राइड ७ सय ५० एमएल फुल क्वाटर ५५ बोतल, इम्पेरियल ब्लु ७ सय ५० एमएल फुल क्वाटर ९० बोतल, ३ सय ७५ एमएल भएको हाफ क्वाटर १ सय ५ बोतल र १ सय २० एमएल भएको हाफ क्वाटर १ सय ५ बोतल गरि जम्मा ३ सय ७८ बोतल फेला पारेको थियो । लागुऔषध सहित तीनै जनालाई नियन्त्रणमा लिएर थप अनुसन्धान गरिरहेको जनाएको छ ।
