हेटौंडाः मकवानपुरको मनहरी गाउँपालिकामा आज बिहीबारदेखि ‘९ ए’ साइड वडाध्यक्ष कप फुटबल प्रतियोगिता सुरु हुँदैछ । गाउँपालिकाको ९ नम्बर वडास्थित रजैयाको केदारेश्वर युवा क्लबको आयोजनामा प्रतियोगिता हुने भएको हो ।
प्रतियोगितामा गाउँपालिकाभित्रका खेलाडीहरुमात्र सहभागी हुन पाउने आयोजक क्लबको उपाध्यक्ष गोकुल मैनालीले जानकारी दिनुभयो । खेलाडीहरुमा मित्रताको सम्बन्ध कायम गर्दै गाउँपालिकाभित्र फुटबल खेलको विकास गर्नका लागि वडाध्यक्ष कप फुटबल प्रतियोगिता आयोजना गर्न लागेको उहाँले बताउनुभयो ।
गाउँपालिकाभित्रको विभिन्न संघसंस्थाहरुको सहयोगमा हुन लागेको प्रतियोगितामा करिब ५ लाख रुपैयाँ खर्च हुने आयोजकको अनुमान छ । प्रतियोगिताको विजेता टिमले नगद ५० हजार रुपैयाँ र उपविजेता टिमले २५ हजार रुपैयाँसहित ट्रफी, मेडल र प्रमाणपत्र प्रदान गर्ने जनाइएको छ । प्रतियोगिताको विधागत उत्कृष्ट खेलाडीहरुलाई पनि पुरस्कृत गरिनेछ ।
