हेटौंडाः मकवानपुरमा दुइ वटा ट्रक एकआपसमा ठोकिदा तीन जनाको मृत्यु भएको छ भने दुई जना घाइते भएका छन् । ट्रक ठोकिएपछि भएको आगलागिबाट दुई वटै ट्रक जलेर नष्ट भएको छ ।
घटनामा ना ५ ख ६६६७ नम्वर ट्रकका चालक चितव राप्ति नगरपालिका ८ का रिहान रुम्बा तामाङ, ट्रकका सहचालक गोरखा जिल्ला गण्डकी गाउँपालिका गोर्दीटारका सुमन चेपाङ र ना ६ ख ६३१ नम्बरको ट्रकका सहचालक मकवानपुर जिल्ला मनहरी गाउँपालिका ३ का अमृत प्रजाको मृत्यु भएकोे जिल्ला प्रहरी कार्यालय मकवानपुरले जनाएको छ । आज बिहान पौने २ बजे मकवानपुरको मनहरी गाउँपालिका वडा नम्बर–६ नयाबस्ती डिपाट गाउँमा हेटौडा तर्फ बाट चितवन तर्फ जादै गरेको ना ६ ख ६६६७ नम्बरको ट्रक र बिपरीत दिशा तर्फ बाट आउदै गरेको ना ६ ख ६३१ नंम्बरको ट्रक एक आपसमा ठक्कर खाई दुर्घटना हुदा दुबै ट्रकमा आगलागी भएको प्रहरी नायब उपरीक्षक टेकबहादुर कार्कीले बताउनुभयो ।
दुर्घटनामा परि ट्रकमा सवार चितवन राप्ति नगरपालिका वडा नम्बर–३ का बिबेक तामाङ, ट्रक चालक मकवानपुर मनहरी गाउँपालिका वडा नम्बर–३ का ३२ वर्षिय अर्जुन कुमार प्रजा घाइते भएका छन् । उनीहरुको उपचारका लागि भरतपुर अस्पताल लगिएको प्रहरीले जनाएको छ ।
ट्रकमा आगलागि भएपछि हेटौंडा उपमहानगरपालिकाको दुई वटा दमकलले आगो निभाउने प्रयास गरिएको थियो । घाईतेहरुले ३ जना व्यक्तिहरु सवारी साधनमा च्यापिएको भन्ने जानकारी गराएपछि प्रहरीले च्यापिएका व्यक्तिको खोजि गरेको थियो । च्यापिएका तीनै जनालाई प्रहरीले मृत अवस्थामा फेला पारि शबलाई हेटौंडा अस्पताल पठाईएको प्रहरी नायब उपरीक्षक कार्कीले जानकारी दिनुभयो । बिहान ७ बजेबाट दुवै तर्फि बाटो सुचारु भएको प्रहरीले जनाएको छ ।
