हेटौंडाः मकवानपुर प्रहरीले लागुऔषध खैरो हिरोइनसहित एक जनालाई पक्राउ गरेको छ । पक्राउ पर्नेमा भीमफेदी गाउँपालिका–५, का २४ वर्षीय रोहित मिजार रहेको जिल्ला प्रहरी कार्यालय मकवानपुरले जनाएको छ ।
शनिबार प्रहरीले हेटौडा–१५ रातोमाटेबाट खैरो हिरोईनसहित मिजारलाई नियन्त्रणमा लिएको हो । रातोमाटे चेकपोष्टमा वीरगञ्जबाट हेटौंडा आउँदै गरेको बागमती प्रदेश–०३–००१ ज ३१५ नम्बरको माईक्रो गाडीलाई प्रहरीले सुरक्षाजाँच गर्दा माइक्रोमा सवार मिजारको साथबाट खैरो हिरोईन एक ग्राम फेला पारेको थियो । मिजारलाई खैरो हिरोइनसहित नियन्त्रणमा लिएर थप अनुसन्धान गरिरहेको प्रहरीले जानकारी दिएको छ ।
