हेटौंडाः कोरोना भाइरस संक्रमित हेटौंडा–४ की दुर्गा पौडेलको विषयमा गलत सन्देश प्रवाह हुने गरी भिडियो बनाएर यु–ट्युवमा अपलोड गर्ने एक युवालाई वडा प्रहरी कार्यालय हेटौंडाले पक्राउ गरेको छ । आज बिहान सवा ११ बजेको समयमा ती युवकलाई पक्राउ गरिएको वडा प्रहरी कार्यालय हेटौंडाका प्रमुख प्रहरी निरीक्षक ईश्वरी भण्डारीले जानकारी दिनुभयो ।
बारा जिल्ला निजगढ नगरपालिका–१२, रतनपुर स्थायी ठेगाना भई हेटौंडा बसेर अध्ययनरत नितेश राज रिजाललाई वडा प्रहरीले हेटौंडा–४, भैरवरोडबाट पक्राउ गरी आवश्यक कारवाहीका लागि जिल्ला प्रहरी कार्यालय मकवानपुरमा बुझाएको छ । ‘सुर्यले हेटौंडा सकाउन लाग्यो, के हेर्दैछ नेपाल पुलिस र हाम्रो सरकार’ शीर्षकमा भिडियो बनाएर राखिएको भिडियोप्रति आपत्ति जनाउँदै कोरोना भाइरस संक्रमित दुर्गा पौडेलका श्रीमान् अनन्तप्रसाद पौडेलले प्रहरीमा साइवर अपराध अन्तर्गत कारवाहीका लागि उजुरी दर्ताअनुसार प्रहरीले आवश्यक कारवाही अगाडि बढाएको प्रहरी निरीक्षक भण्डारीले बताउनुभएको छ ।
