हेटौँडाः जिल्लास्तरीय खुल्ला वक्तृत्वकला प्रतियोगितामा आकृति घिमिरे प्रथम भएकी छिन् । सोमबार जिल्ला युवा समिति मकवानपुरले हेटौँडामा आयोजना गरेको ‘युवा र नवप्रवर्तन’ विषयक प्रतियोगितामा घिमिरे प्रथम भएकी हुन् । प्रथम भएकी घिमिरे प्रदेशस्तरीय प्रतियोगितामा पनि सहभागी हुनेछिन् ।
यस्तै सरोज विक द्वितीय र कृतिका लौडारी तृतीय भएका छन् । प्रथम, द्वितीय र तृतीयले क्रमशः १५ हजार, १० हजार र ५ हजार रुपैयाँ प्राप्त गरेका छन् । प्रतियोगितामा १२ जनाको सहभागिता रहेको थियो । जिल्ला युवा समिति मकवानपुरका अध्यक्ष सुमन पाख्रिनको सभाध्यक्ष तथा जिल्ला समन्वय समिति मकवानपुरका प्रमुख ललित घलानको प्रमुख आतिथ्यमा पुरस्कार वितरण गरिएको थियो । कार्यक्रममा बागमती प्रदेश युवा परिषद्का कार्यकारी उपाध्यक्ष सन्तोष चौलागाईको पनि आतिथ्य रहेको थियो ।
