हेटौँडाः नुवाकोट जिल्लाका बेलकोटगढी नगरपालिका–७ ठुलोखोलामा सवारी दुर्घटना हुँदा एक जनाको मृत्यु भएको छ । बिहिबार बिहान १० बजेर २५ मिनेटको समयमा देवीघाटबाट काठमाडौं गइरहेको बा ०३–००१ ख २५८४ नम्वरको टिफर र विपरित दिशाबाट आइरहेको बा ०२–०२९ प ५७५८ नम्बरको मोटरसाइकल एक आपसमा ठोकिँदा मोटरसाइकलको पछाडी सवार नुवाकोटको लिखु गाउँपालिका–१ बस्ने ५० वर्षीय नेत्रमान बिकको मृत्यु भएको बागमती प्रदेश प्रहरी कार्यालय हेटौँडाले जनाएको छ ।
टिफरको ठक्करबाट नेत्रमान बिक गम्भीर घाइते भएका थिए । घाइते बिकलाई उपचारका लागि जिल्ला अस्पताल लगिएकोमा उपचारको क्रममा बिहान ११ बजेको समयमा मृत्यु भएको प्रहरीले जानकारी दिएको छ । यस्तै, टिफरको ठक्करबाट मोटरसाइकल चालक लिखु गाउँपालिका–१ बस्ने २० वर्षीय निरज बिक घाइते भएका छन् । घाइते निरजलाई उपचारका लागि जिल्ला अस्पताल लगिएकोमा सामान्य उपचार पश्चात थप उपचारका लागि काठमाडौंस्थित ग्राण्डी अस्पताल लगिएको प्रहरीले जनाएको छ । दुवै सवारी साधन र र टिफर चालक प्रहरीको नियन्त्रणमा रहेको छ ।
